Nûnerên sê beşên civata kurd (Platforma Neteweyî ya Kurdistana Bakur -PNK-Bakur, Însîyatîfa Kurdên Ewropayê-Însiyatîf, Koordinasyona Demokratîk a Kurdên Ewropa- DEM-KURD) di 20-21.07.2002a de li Swêdê li bajarê Stockholmê civiyan. Nûnerên her sê besên civatê li ser pirs û pirsgirêkên kurdên li Ewrûpayê rawestiyan.
Civînê diyar kir ku miletê kurd yek ji miletên herî kevn û mezin yê Rojhilata Navîn e. Weke hemû miletan mafê miletê kurd jî heye ku qedera xwe bi destê xwe û bi azadî tayîn bike; li ser axa xwe serbest û azad bijî û îdareya welatê xwe bi destê xwe bi rê ve bibe.
Tu kes û welatan weke kurdan êş û azar ji destê terorê nekişandiye. Ta ku kurd mafên xwe yên neteweyî û demokratîk bi dest nexin, ne li Kurdistanê, ne li welatên dagirkerên Kurdistanê (Tirkiye, Îran, Iraq û Sûriye) ne jî li Rojhilata Navîn aştî, aramî û demokrasî pêk nayê.
Nêzîkî mîlyonek kurd li seranserê Ewropayê weke kurd û ewropayî dijîn. Îro jî bi hezaran kurd ji ber zilm û zordariya dagirkeran berê xwe didine Ewropayê. Maf û berpirsiyariyên kurdên li Ewropayê wek kurd û ewropayî hene. Pirsa kurd, bûye pirsa Yekitiya Ewropayê jî. Divê dewletên Ewropayê, li ser çareserkirina pirsa kurd û Kurdistanê rawestin daku çareserkirina vê pirsê bi tenê bi "însafa" dewletên dagirkerên Kurdistanê ve neyê girêdan.
Di pêvajoya endametiya Tirkiyeyê de, divê Yekitiya Ewropayê daxwaz û armancên kurdan jî bide ber çavên xwe. Di danûstendinên endametiya Tirkiyeyê de, kurd teref in. Di pirsa kurd û statuya Kurdistanê de divê kurd xwedî desthilat bin.
Civînê girîngiyek taybet da bidestketinên li Başûrê Kurdistanê. Kurdên Başûr ev e 11 sal in li ser beşeke axa xwe ya azad îdareya xwe bi rê ve dibin. Her sê beşên civata kurd piştgiriya daxwaza "Di Iraqeke Demokratîk de Kurdistaneke Federe", ya kurdên Başûr dikin. Divê Yekîtiya Ewropayê û mueseseyên din yên navneteweyî daxwaz û hesasiyetên ku di pirsên navneteweyî de nîşan didin, di pirsa kurd û Kurdistanê de jî nîşan bidin.
Bi berpirsiyarî û zanîna girîngiya vê xebata hevbeş, her sê beşên civata kurd biryar dan ku bi navê Platforma Kurdên Ewropayê-PLATFORM, dest bi xebatê bikin.
Platform bi vê daxuyaniya ji raya giştî re bangî hemû hêz û welatparêzên kurd dike û li hêviya alîkarî û piştgiriyê ye.
Civînê biryar da ku her sê beşên civatê bi hev re:
· Li welatên Ewropayê komîteyên kar ava bikin.
· Ji bo vê xebatê broşûr û bulten bêne weşandin û malperan (website) ava bikin.
· Semîner, panel, konferans û şevahengan pêk bînin.
· Ji bo dîplomasî û lobîyeke kurdî kar bê kirin.
· Li ser pirs û pirsgirêkên kurdên li Ewropayê yên nasnameyî, civakî û çandî rawestin.
Platforma Kurdên Ewropayê - PLATFORM
Stockholm, 21.07.2002
DEM -KURD:
Civata Kurd (Giessen) û Civata Kurd li Elmanya (Koln) û Dengê Kurdan li Duisburgê û FKKS - Federasyona Komeleyên Kurdistanê li Swêdê û Hevkar-Elmanya û IVK (Mainz) û Kitêbxaneya Kurdî li Stockholm û Komela Kurdistan li Belçîka û Komela Çanda Karkerên Kurdistan-KOÇ-KAK û Komela Karkerên Kurdistan –Awusturya (Nemse) û Komela Karkerên Kurdistan- Danmarka û Komela Karkerên Kurdistan Swîsra û Komela Karkerên Kurdistan-Frensa û Komela Navnetewî ya ji bo Mafên Mirov li Kurdistanê (Elmanya) û Kurdish Advice Centre (Brîtanya Mezin) û XOYBÛN-Berlin û XOYBÛN-Danmarka û Yekitiya Karkerên Kurdistan li Holland û Yekitîya Komelên Kurdistan-KOMKAR (Elmanya)
Înisiyatîfên Kurdên Ewropayê IKE- INISIYATIF:
Inîsîyatîfa Kurdên Almaniya-, Inisiyatîfa Kurdên Avusturya, Inisiyatîfa Kurdên Danimarka, Inisiyatîfa Kurdên Fransa, Inisiyatîfa Kurdên Hollanda, Inîsîyatîfa Kurdên Ingiltere, Inîsîyatîfa Kurdên Swêd, Inîsîyatîfa Kurdên Swîsre.
Plattforma Neteweyî ya Kurdistana Bakur -PNK-Bakur
Partiya Azadî Demokrasî ya Kurdistanê-Padek, Partiya Îslami ya Kurdistanê-PIK, Partiya Sosyalîst ya Kurdistanê-PSK, Rêxistina Sosyalîst û Demokratîk ya Kurdistanê-RSDK, Partiya Rizgarî ya Kurdistanê-RIZGARÎ
